Onte Lugo vestiuse de gala para vivir unha noite que moitos tardarán en esquecer, a III edición da Gala Lucus Moda. O público, que ateigou o Salón Rexio do Círculo das Artes, disfrutou coas creacións espectaculares e sorprendentes das cinco firmas que nos acompañaron ou coa presentación da temporada 2012 da nosa madriña, Kina Fernández.
Do mesmo xeito, moi poucos quedaron indiferentes ante os complementos que os 15 artesáns crearon para a ocasión ou cos peiteados que algún podería considerar imposibles se non os vise cos seus propios ollos.
Mais talvez quen tarde tempo en esquecer esta noite son as novas deseñadoras da provincia: Verónica Marí Granda, que levou o primeiro premio cunha creación onde o vimbio se converte en moda, Gloria López Santomé, que acadou o segundo; e Silvia Sánchez Corral, o terceiro. As tres mulleres presentaron uns deseños arriscados e, sobre todo, creativos que lle auguran un grande porvir no mundo das pasarelas.
A velada estivo chea de grandes momentos, desde a confesión da timidez de toda unha referente da moda española como é Kina Fernández, ata aqueloutro en que o noso presentador, Liborio García, departiu, de xeito entrañable, coa súa familia, que o acompañou en primeira fila á cita coa moda lucense.
A III Gala Lucus Moda 2012 contou cunha ampla cobertura dos medios de comunicación. O alumnado da Fundación Tic non perdeu detalle de todo canto acontecía na pasarela e nos próximos días poderemos gozar do seu traballo. Ao mesmo tempo, os medios de comunicación tradicional e blogueiras especializadas asistiron para dar boa conta nos seus blogs e edicións e o evento contou con forte presenza nas redes sociais. A Deputación retransmitiuno en directo a través da súa conta de Twitter e Instagram mediante o hashtag #galalucusmoda.
Podes encontrar máis información sobre a gala na páxina da Deputación de Lugo ou nas seguintes ligazóns:
Loading ...